अनेसास जापानको १४औँ अधिवेशन डिसेम्बर ७ मा टोकियोमा आयोजना हुने

अन्तर्राष्ट्रिय नेपाली साहित्य समाज (अनेसास) जापान च्याप्टरले आगामी डिसेम्बर ७ मा टोकियोमा आफ्नो १४औँ अधिवेशन आयोजना गर्ने तयारी गरेको छ। संस्थाको ७८औँ नियमित साहित्यिक शृङ्खलालाई विशेष अवसरका रूपमा उपयोग गर्दै, कार्यक्रम अन्तर्गत कविता, कथा, गजललगायतका विविध विधाका रचना वाचन तथा केही लेखकका पुस्तकहरूको औपचारिक विमोचन समेत हुने भएको छ।

अधिवेशन सिनओकुबोस्थित रोयल गार्डेन रेस्टुरेन्टमा आयोजना हुने छ। सोही कार्यक्रममा अनेसास जापान च्याप्टरको आगामी दुई वर्षका लागि नयाँ कार्यसमिति चयन गरिनेछ। जापानमा बसे–बस्दै नेपाली साहित्यिक गतिविधिलाई निरन्तरता दिएको अनेसास जापानको नेतृत्व चयनमा यसपटक पनि समुदायको विशेष ध्यान केन्द्रित भएको छ।

संस्थाका अध्यक्ष अरुण पौडेलले जापानमा बसोबास गर्ने नेपालीभाषी, साहित्यकर्मी तथा साहित्यप्रेमी सबैलाई च्याप्टरको आगामी नेतृत्वमा जोडिन र सक्रिय भूमिका निभाउन आग्रह गरेका छन्। अनेसास जापानले विगतमा प्रायः सर्वसम्मतिका आधारमा नेतृत्व चयन गर्दै आएको उल्लेख गर्दै, यस पटक पनि सहमतिमै नयाँ कार्यसमिति बन्ने अपेक्षा राखिएको छ।

अनेसास जापान, अन्तर्राष्ट्रिय नेपाली साहित्य समाजका च्याप्टरहरूमध्ये पटक–पटक ‘सर्वोत्कृष्ट च्याप्टर’ का रूपमा सम्मानित हुँदै आएको, अत्यन्त सक्रिय र प्रभावशाली च्याप्टरका रूपमा पहिचान स्थापित गरिसकेको छ।