जापानमा चामलको मूल्यमा नयाँ रेकर्ड, सरकारले सञ्चित भण्डारण बजारमा पठाउँदै

क्योतो, मार्च २८ — जापानमा चामलको मूल्य निरन्तर बढ्दै गएको छ, हालै नयाँ कीर्तिमान कायम गर्दै ५ किलोको औसत मूल्य ४,१७२ येन (अन्दाजी २८ डलर) पुगेको छ। सरकारले मूल्य नियन्त्रण गर्न सञ्चित चामल बजारमा पठाउने घोषणा गरे पनि प्रभाव देखिएको छैन।

मार्च १० देखि १६ सम्म जापानभरका सुपरमार्केटहरूमा चामलको मूल्य गत वर्षको सोही अवधिको तुलनामा दोब्बरले बढेको छ। यो वृद्धि लगातार ११ औं हप्ता जारी रहेको र मार्च २०२२ मा तथ्यांक संकलन सुरु भएयता उच्चतम बिन्दुमा पुगेको छ।

सरकारले फेब्रुअरीको मध्यतिर २१०,००० टन सञ्चित चामल बजारमा पठाउने घोषणा गरेको थियो। कृषि, वन तथा मत्स्य मन्त्रालयले मार्च १० देखि १२ सम्म करिब १,४२,००० टन चामल लिलाम गरेको थियो, जसको ९४ प्रतिशत राष्ट्रिय कृषि सहकारी महासंघ (जेए समूह) ले खरिद गर्यो।

बजारमा पहिलो चरणको चामल यो महिनाको अन्त्यसम्म आइपुग्ने अनुमान गरिएको छ। यदि मूल्य नियन्त्रण नभएमा सरकारले थप सञ्चित चामल जारी गर्नुपर्ने विज्ञहरूले सुझाव दिएका छन्।

चामलको मूल्य वृद्धिको मुख्य कारण २०२३ को गर्मी याममा उच्च तापक्रमका कारण उत्पादनमा गिरावट आउनु हो। साथै, जापानमा विदेशी पर्यटकहरूको चाप बढेपछि रेस्टुरेन्टहरूमा चामलको खपत पनि बढेको छ।