जापानका ओनसेन  रिसोर्टहरूमा पानी संकट: पर्यटकको बृद्धिले संकट चुलिँदै

जापानका विभिन्न तातोपानी (अनसेन) रिसोर्टहरूमा पानीको संकट देखिएको छ। विदेशी पर्यटकहरूको उल्लेखनीय वृद्धिले पानीको प्रयोग बढाएकाले केही अनसेनहरू बन्द गर्न बाध्य भएका छन्। स्थानीय प्रशासनले शनिबार जानकारी दिएको छ कि नयाँ बोरिङमा प्रतिबन्ध लगाइएको छ र पानी बचतका उपायहरू अपनाइएको छ, तर दीर्घकालीन समाधान अझै सुनिश्चित हुन सकेको छैन।

सागा प्रिफेक्चरको उरेशिनो अनसेनमा पानीको स्तर खस्कँदै गएको भन्दै नगरप्रमुख दाइसुके मुराकामीले जनवरी अन्त्यतिर आपत्कालीन पत्रकार सम्मेलनमा भने, “पानीको स्तर घट्दै गएको छ, तर अनसेनहरू अझै सञ्चालनमा छन्।” उनका अनुसार, उरेशिनो अनसेनको मुख्य स्रोतमा पानीको स्तर सन् २०२३ मा घटेर ४०.८ मिटर पुगेको थियो, जुन अहिलेसम्मकै न्यूनतम हो।

उक्त प्रिफेक्चरका अधिकारीहरूका अनुसार, शिंकान्सेन बुलेट ट्रेन सेवाको विस्तारपछि पर्यटकको चाप अत्यधिक बढेको छ, जसले पानी संकटलाई थप चुल्याएको हो। अधिकारीहरूले अनसेनहरूलाई दैनिक पानी निकासी सीमित गर्न र केही होटेलहरूलाई रातभर कोठामा बाथ प्रयोग गर्न रोक्न अनुरोध गरेका छन्, जसले पानीको स्तर बिस्तारै पुनःस्थापित गर्न सघाउ पुर्‍याउने अपेक्षा गरिएको छ।

अन्य प्रिफेक्चरका अनसेनहरूमा पनि यस्तै समस्या देखिएको छ। स्थानीय सरकारले नयाँ बोरिङमा रोक लगाउनुका साथै पानी बचतका उपायहरू अपनाउन प्रेरित गरिरहेको छ। तर, बढ्दो पर्यटक चापका कारण यी उपायहरू पर्याप्त नहुन सक्ने चिन्ता व्यक्त गरिएको छ।

तातोपानी अनुसन्धान केन्द्रका एक वरिष्ठ अनुसन्धानकर्ताका अनुसार, पानीको अत्यधिक दोहन नै पानीको सतह घट्नुको मुख्य कारण हो। उनले भने, “वैज्ञानिक रूपमा जल स्रोतको व्यवस्थापन गर्नुपर्छ। पानीको स्तर नियमित रूपमा डेटा मार्फत निगरानी गरेर अनावश्यक प्रयोग रोक्न जरुरी छ।”

केन्द्र सरकारको हालैको तथ्यांकअनुसार, जापान भ्रमण गर्ने विदेशी पर्यटकहरूको संख्या २०२४ मा ३६ मिलियन नाघेको छ, जुन ऐतिहासिक रूपमा सबैभन्दा उच्च हो। कमजोर येनको विनिमय दर र कोभिड-१९ महामारीपछि हवाई मार्गहरू पुनःसञ्चालन हुनु मुख्य कारण रहेको बताइएको छ।

पर्यटन प्रवर्द्धनले जापानको अर्थतन्त्रलाई बल दिएको भए पनि, अनसेन क्षेत्रको दिगो सञ्चालनका लागि पानीको दीर्घकालीन व्यवस्थापन अनिवार्य भएको सरोकारवालाहरू बताउँछन्।